La petición está dirigida a: Petitionsausschuss des Europäischen Parlaments

Il-petizzjonant jinsab imħasseb dwar l-allegata implimentazzjoni mhux korretta minn Spanja tar-regoli dwar in-newtralità tan-Netwerk. Fil-fehma tal-petizzjonant, Spanja implimentat b'mod mhux xieraq ir-Regolament tal-UE dwar l-Internet Miftuħ (ir-Regolament (UE) 2015/2120) li ġie adottat fil-25 ta' Novembru 2015 mill-Parlament Ewropew u mill-Kunsill u l-linji gwida ta' implimentazzjoni li ġew adottati f'Awwissu 2016 mill-Korp tar-Regolaturi Ewropej tal-Komunikazzjonijiet Elettroniċi (BEREC). Il-petizzjonant isostni li skont il-leġiżlazzjoni tal-UE, l-infurzar tar-regoli dwar l-internet miftuħ huwa kompitu importanti tal-awtoritajiet regolatorji nazzjonali. Madankollu, fi Spanja, il-korp responsabbli għall-implimentazzjoni, li huwa s-Segretarjat tal-Istat għas-Soċjetà tal-Informazzjoni u l-Aġenda Diġitali taħt il-ġurisdizzjoni tal-Ministru għall-Enerġija u l-Aġenda Diġitali, mhuwiex wieħed indipendenti. Il-petizzjonant isostni li Spanja qed tikser ir-Regolament peress li din ma waqqfitx mezz separat sabiex jitressqu lmenti dwar in-newtralità tan-netwerk u mhijiex qed timplimenta d-dispożizzjonijiet dwar in-newtralità tan-Netwerk b'mod effiċjenti.