La petición está dirigida a: Petitionsausschuss des Europäischen Parlaments

Il-petizzjonant isostni li d-ditta CESS hija SME u kumpanija b'responsabbiltà limitata b'żewġ sħab; dawn huma wkoll diretturi maniġerjali u impjegati. Skont il-petizzjonant, l-attività ewlenija tad-ditta hija l-involviment f'għadd ta' proġetti ta' riċerka relatati mas-sigurtà fil-livell nazzjonali u internazzjonali u, b'mod partikolari, fis-sitt u fis-seba' Programmi Qafas ta' Riċerka tal-UE. Huwa jispjega wkoll li, b'rabta mal-proġett PULSE tal-FP7, id-ditta tiegħu sarilha awditu mill-Qorti Ewropea tal-Awdituri fir-rigward tar-rata ta' kull siegħa mitluba mis-sħab, u li dan wassal għal tnaqqis ta' madwar 33 % fir-rata ta' kull siegħa aċċettata u, sussegwentement, fi rkupru sostanzjali tal-pagamenti mis-CESS jew fiż-żamma ta' aktar minn EUR 70 000 f'dawk li huwa jqis bħala l-pretensjonijiet ġustifikati tad-ditta. B'riżultat ta' dan, skont il-petizzjonant, dik li altrimenti mhi xejn għajr ħlief ditta ta' suċċess kbir, tista' tagħlaq u, agħar minn hekk, tfalli. Fil-fehma tal-petizzjonant, l-eżitu tal-awditu tal-proġett jirriżulta minn differenza fl-evalwazzjoni tal-persunal u tas-sħab tad-ditta. Madankollu, skontu, dan huwa żball u, minħabba li d-ditta hija SME, jikkostitwixxi interpretazzjoni ħarxa tat-terminu "salarju" mill-Qorti tal-Awdituri, peress li, fl-opinjoni tiegħu, dan huwa assoċjat b'mod skorrett ma' kuntratt ta' impjieg, li s-sħab f'kumpaniji b'responsabbiltà limitata ma jidħlux fih. Il-petizzjonant isostni li l-kalkolu obbligatorju tar-"rata fissa ta' Marie Curie" magħmul mill-Kummissjoni fid-Deċiżjoni C(2011) 174 dwar ir-remunerazzjoni tas-sidien tan-negozji li ma jirċevux salarju, jirrifletti b'mod żbaljat ir-reviżjoni, mitluba mill-Parlament u mill-Kunsill, tal-metodi ta' kalkolu fi ħdan is-Seba' Programm Qafas ta' Riċerka. Skontu, il-kalkolu ttieħed minn programm ieħor, li, madankollu, huwa relatat mar-remunerazzjoni ta' organizzazzjonijiet mingħajr skop ta' qligħ, pereżempju remunerazzjoni għar-riċerkaturi sekondati mill-universitajiet, iżda li ma jkunux sħab f'ditti. Għalhekk, huwa qed jitlob li ssir verifika fir-rigward ta' jekk id-deċiżjoni tal-Kummissjoni tinterpretax b'mod korrett dak li ġie stabbilit mill-Parlament (id-deċiżjoni tat-23 ta' April 2009 (2009/633/KE, Euratom) u mill-Kunsill fl-14 ta' Ottubru 2010 (14980/10).