04.01.2019, 15:48
Tgi vess sminau in tal sustegn: suenter gnanc treis meins han gia varga 4'200 persunas suttascret la petiziun per la liberalisaziun dil celibat. Quei ei daveras in impressiunont mussament da solidaritad denter ils cartents che sentan che la veta cumineivla da cardientsch en nossas pleivs ei periclitada muord la gronda munconza da spirituals. Cordial engraziament per mintga suttascripziun ed era per ils nummerus impressiunonts commentaris vitier!
Jeu sun era engrazieivla che diversas gasettas han gidau da far attents sin quella petiziun . Capeivlamein eis ei il givisch dils schurnalists e dils editurs che lur gasettas vegnien era legidas e perquei tschentan ei magari tetels da sensaziun sco sch’ jeu fussi en in cumbat persunal cul papa. Quei che jeu fetschel ei argumentar e supplicar, buca cumbatter (mira la brev al papa, ch’ei d’anflar sut ‘Dokumente’) ed jeu envidel da prender posiziun damai che nus cartents purtein era ina certa responsabladad per la veta da cardientscha communabla en nossas pleivs. Jeu sundel buca encunter il celibat, mobein per la libertad da decisiun per quel ni per il matrimoni. Sin fundament da mia veta celibatara da varga 50 onns sai jeu bein avunda ch’igl ei pusseivel dad esser ventireivels sch’ins viva il celibat, mo jeu sai era che quei ei pusseivel mo sch’ins ha retschiert dil Segner la clamada per quella via. Plinavon sundel jeu perschuadida ch’ins sa viver ina veta plascheivla a Diu en mintga stan. Ch’ins seigi maridaus ni celibatars, ins sto viver endretg, per nus cristians vul quei dir viver tenor ils condaments da Diu e tenor il spért digl evangeli.
Il fatg che perfin ils uestgs radunai entuorn il papa han constatau ils 7 da december digl onn 1965 en lur decret PRESBITERORUM ORDINIS ch’il sacerdoci pretendi buca la veta celibatara, ha motivau mei da vegnir activa e da lantschar quella petiziun.
Il davos temps sundel jeu adina puspei vegnida confruntada cun la damonda, daco che jeu seigi buca sedrizzada cun quella supplica igl emprem als uestgs. Il motiv ei quel ch’ils uestges han da setener vid las ordras che vegnan da Roma, pia dil papa e ston pia pretender dils candidats che vulan daventar spirituals l’empermischun solemna, ch’els vegnien lu a viver sco spirituals a moda celibatara. Senza quell’empermischun astgan ils uestgs buca ordinar enzatgi spiritual. Per quei motiv sundel jeu perschuadida che igl adressat da questa petiziun sto esser papaFrancestg sez.
Jeu sun perschuadida d’anflar ensemen cun persunas dalla medema perschuasiun mieds e vias per saver surdar a papa Francestg persunalmein la supplica da quella petiziun ensemen cun tut las suttascripziuns rimnadas e presentar ad e nossa motivaziun. Perquei fuss ei buca mo bi mobein orvontut d’impurtonza sche quellas suttascripziuns fussen aunc pli nummerusas. Cordial engraziament a tut tgi che recamonda quella petiziun e per mintga ulteriura suttascripziun.
Breil, ils 31 da december 2018
Florentina Camartin, Autura dalla petiziun
