Petícia je adresovaná: Petitionsausschuss des Europäischen Parlaments

Il-petizzjonant, huwa u jirreferi għas-setgħa mogħtija lill-Kummissjoni mit-Trattat tal-UE (l-Artikolu 17(1)) li "tissorvelja l-implimentazzjoni tad-dritt tal-Unjoni taħt il-kontroll tal-Qorti tal-Ġustizzja tal-Unjoni Ewropea" u r-rwol tagħha bħala l-"gwardjan tat-Trattati", jilmenta li din id-dispożizzjoni tagħti lill-Kummissjoni marġini wiesgħa ta' diskrezzjoni fir-rigward ta' "jekk" u "meta" tiddeċiedi li tibda proċedura ta' ksur kontra l-Istati Membri li jonqsu milli jissodisfaw l-obbligi tagħhom (l-Artikoli 258 u 260 tat-TFUE). Bħala evidenza għal dawn, huwa jikkwota siltiet mill-Komunikazzjoni tal-Kummissjoni tad-19 ta' Jannar 2017 "Id-Dritt tal-UE: Riżultati aħjar permezz ta' applikazzjoni aħjar" (2017/C 18/02). Fil-punt 3, il-Kummissjoni tagħmel l-eżerċizzju ta' din is-setgħa diskrezzjonali soġġett għad-definizzjoni ta' prijoritajiet strateġiċi (u tikkwota sentenzi tal-Qorti tal-Ġustizzja, inkluża dik tal-14 ta' Settembru 1998 fil-Kawża T-571/93, li tenfasizza l-fatt li ċ-ċittadini mhux se jirnexxu f'azzjonijiet imressqa kontra l-Kummissjoni jekk din tonqos milli tibda proċedura ta' ksur). Fil-punt 8 tal-Anness għal din il-Komunikazzjoni, il-Kummissjoni ssemmi l-limitu ta' żmien ta' sena biex jiġu eżaminati l-ilmenti taċ-ċittadini, iżda tenfasizza li dan il-limitu ta' żmien mhuwiex assolut. Il-petizzjonant jirreferi wkoll għall-konklużjonijiet (id-Deċiżjoni tal-14 ta' Settembru 2017) tal-inkjesta strateġika tal-Ombudsman Ewropew dwar l-għażla taż-żmien u t-trasparenza ta' proċeduri ta' ksur, li, filwaqt li jirrikonoxxi li l-Komunikazzjoni msemmija hawn fuq hija sinjal pożittiv li l-Kummissjoni hija konxja ferm tal-problema u beħsiebha tirrimedjaha, tagħmel tmin rakkomandazzjonijiet bil-għan li jinkiseb progress sostanzjali f'dan il-qasam. Bħala konklużjoni, il-petizzjonant jitlob lill-Parlament jintervjeni, permezz ta' atti leġiżlattivi xierqa, biex inaqqas il-marġni ta' diskrezzjoni tal-Kummissjoni fl-eżerċizzju tas-setgħat ta' kontroll tal-Istati Membri, li fihom jiġi espress ir-rwol istituzzjonali tagħha bħala l-gwardjan tat-Trattati.